ل کۆلیژا پەروەرده‌يا بنیات سەمپۆزیۆمەک هاتە پێشکێشکر

د چوارچۆڤێ چالاكيێن زانستى و ئه‌كاديمى يێن زانكۆيا زاخۆ دا، كۆليژا په‌روه‌رده‌يا بنيات ب هه‌ردوو پشكێن (زمانێ كوردى و زمانێ عه‌ره‌بى)، لژێر چاڤدێرييا به‌ڕێز (پ.هـ.د. دلبرين عه‌بدوللا عه‌لى) ڕاگرێ كۆليژێ، ل ڕۆژا پێنجشه‌مبى ڕێكه‌فتى (٢٠٢٦/٢/٥)، ئێكه‌مين سه‌مپۆزيۆما خۆ يا نێڤده‌وله‌تى لژێر ناڤونيشانێ:
«ئه‌ديبێن كورد ل ده‌رڤه‌ى وه‌لاتى: ئه‌زموونێن زمانى و ئه‌ده‌بى د ناڤ جيهانا غه‌ريبيێدا»
ئه‌ڤ سه‌مپۆزيۆمه‌ ب ئاماده‌بوونا هاریکارێن سەرۆکێ زانکۆیێ و هژماره‌كا مامۆستا، قوتابى و ڤه‌كۆله‌ران هاته‌ ئه‌نجامدان، كو تێدا تیشک ئێخستە سەر كاريگه‌رييا كۆچبه‌ريێ و ژيانا غه‌ريبيێ ل سه‌ر ئافراندنا ئه‌ده‌بى و پاراستنا ناسنامه‌يا زمانى.
مێهڤانێن سه‌مپۆزيۆمێ:
د ڕوينيشتنه‌كا زانستى و دانوستاندنێدا، سێ كه‌سايه‌تيێن ديار يێن بوارێ ئه‌ده‌ب و ئه‌كاديميا كوردى ل ده‌رڤه‌ى وه‌لاتى پشكدار بوون:
* به‌ڕێز به‌ده‌ل ڕه‌فو: (ژ وه‌لاتێ نه‌مسا)
* د. موئه‌يه‌د عه‌بدولستار: (ژ وه‌لاتێ سوێد)
* د. به‌لسه‌م كه‌ره‌م: (مامۆستا ل زانكۆيا ڕۆتبرغ - سوێد).
ته‌وه‌رێن سه‌ره‌كى يێن گۆتوبێژێ:
د ناڤه‌ڕۆكا سه‌مپۆزيۆمێدا، چه‌ندين ته‌وه‌رێن گرنگ هاتنه‌ به‌حسكرن، ژ وان ژى:
* ئه‌زموونا ئه‌ده‌بى د غه‌ريبيێدا: چه‌وانيا گونجاندنا ئه‌ديبێ كورد د گه‌ل جيهانبينا ڕۆژئاڤايى و پاراستنا ڕه‌سه‌ناتييا نڤيسينێ.
* سه‌ربۆڕێن كه‌سى: پشكداربوويان به‌حس ل ئاسته‌نگ و ده‌رفه‌تێن نڤيسينێ ب زمانێ دايک و زمانێن بيانى ل ده‌رڤه‌ى وه‌لاتى كر.
* په‌يوه‌ندييا ئه‌ديبى ب نيشتمانى ڤه‌: كاريگه‌رييا ديركه‌فتنێ ژ جۆگرافيا كوردستانێ ل سه‌ر ئاراسته‌يێن هزرى و ئه‌ده‌بيێن نڤيسه‌ران.
ل دوماهييا سه‌مپۆزيۆمێ، ده‌رگه‌هێ دانوستاندنێ بۆ ئاماده‌بوويان هاته‌ ڤه‌كرن. قوتابى و مامۆستايان ب پسيار و تێبينيێن خۆ بابه‌ت زه‌نگينتر كرن، و ژ لايێ پانێليستان ڤه‌ ب هويربينى و ب شێوازه‌كێ زانستى به‌رسڤا وان هاته‌ دان. ئه‌ڤ چالاكييه‌ وه‌ك پێنگاڤەک بۆ بهێزكرنا پرێن په‌يوه‌نديێ د ناڤبه‌را ئه‌كاديميا ناڤخۆ و ئه‌ديبێن كورد يێن ل ده‌رڤه‌ دهێته‌ هه‌ژمارتن.